मध्यपुर थिमी, १० वैशाख । जीर्णोद्वारको अन्तिम चरणमा पुगेको ऐतिहासिक पचपन्न झयाले दरबारभित्र पश्चिम उत्तर कुनामा मल्ल राजाहरुले प्रयोग गर्ने ऐतिहासिक एवम् पुरातात्विक इनार भेटिएको छ । पुरातत्व विभाग र नगरपालिकाले जीर्णोद्वार गरेको उक्त दरबारमा माटोले पुरिएको अवस्थामा इनार भेटिएको पुरातत्व विभाग दरबार हेरचाह कार्यालयकी प्रमुख अरुणा नकर्मीले बताउनुभयो । ऐतिहासिक उक्त इनारको मर्मत गरी संरक्षण गरिने भएको छ । यसअघि पनि उक्त दरबारको जीर्णोद्धारकै क्रममा दुई वर्षघि मल्लकालीन शौचालय फेला परेको थियो ।