२२ अप्रिल, ०८ । आजदेखि तीन दिनसम्म देशभर विभिन्न कार्यक्रमका साथ लोकतन्त्र दिवस मनाइँदै छ ।

राजा ज्ञानेन्द्रको प्रतिगमनविरुद्ध गरिएको आन्दोलन सफल भएको अवसर पारेर आजदेखि ३ दिनसम्म लोकतन्त्र दिवस मनाइने भएको हो । राजा ज्ञानेन्द्रविरुद्ध सात दल र भूमिगत सशस्त्र बिद्रोह गरिरहेको नेकपा माओवादीको संयुक्त आन्दोलन २०६३ साल बैशाख ११ गते सफल भएको थियो ।

लोकतान्त्रिक आन्दोलनको सफलतासँगै नेकपा माओवादी पनि शान्तिपूर्ण राजनीतिक बाटोमा सामेल भएको थियो । लोकतन्त्र दिवस भव्यताका साथ मनाउन सरकारले सबै सरकारी कार्यालय, शिक्षण संस्था र विदेशमा रहेका कूटनीतिक नियोगहरूमा विदा दिने निर्णयगरेको छ ।

आज विभिन्न राजनीतिक दल, सामाजिक सङ्घसंस्था र शिक्षण संस्थाहरूले पनि लोकतन्त्र दिवसका अवसरमा विभिन्न कार्यक्रमहरूको आयोजना गर्दैछन् । लोकतन्त्र दिवसलाई भव्यताका साथ मनाउन आग्रह गर्दै सरकारले प्रधानमन्त्री गिरिजाप्रसाद कोइरालाको अध्यक्षतामा लोकतन्त्र दिवस मूल समारोह समिति गठन गरेको छ ।